الديمقراطية هي الحل

انا مش حبه نتكلم ليه نعم وليه لأ علي التعديلات الدستورية لان ده شئ بالفعل كلنا بنتكلم فيه دلوقتي وأغلبنا بنبحث فيه

برغم اني ما زلت مش محددة موقفي بنسبة 100% من الرد علي التعديلات إلا ان شايفه كتير حددوا  أرائهم...ده كويس جدااا...وجميل ان في ناس محترمة اوي فكرياً وقانونيا من الطرف المؤيد للتعديلات...وناس محترمة فكريا وقانونيا من الطرف المعارض لها

وده إن دل علي شئ فيدل اننا أول مرة نعاصر ديمقراطية حقيقية بدل ما كنا بنعاصر ديمقراطية مزيفة عبرت عنها الشاعرة إيمان بكري بكلمات

 " ديمقراطية ومش هي بس الشبه عشره الميه ..9 علشان العالمية وواحد ليمون بالملوخية".....فعلاً للأسف كان ده وضعنا.

والاختلاف اللي حاصل بينا دلوقتي مش بس ديمقراطية وأمر طبيعي وصحي  ...لكنه بيدل علي قمة التوافق في أمر مهم جدااا وهو حب الوطن من الطرفين.

لكن اللي رافضه وجوده تماماا  هو الافتراءات علي من يختلف معنا في وجهات النظر...وإتهام اي طرف لغيره بقله الوعي او الانتهازية .

وده للأسف أمر لقيته من شخصيات كتير كنت بحترمها..بس بمجرد انها تعتبر وجهه نظر مخالفة ليها عدم وعي..ونختزل الموضوع ان الطرف الرافض للتعديلات  مش فاهم شئ ومش عايز الاستقرار لوطنه وبيتكلم بلا وعي...أو نختزل الموضوع ان المؤيد للتعديلات بيسعي لمصلحة فئة ما سواء الاخوان او الوطني ...ده من وجهه نظري هو قلة الوعي الفكري من اي من الطرفين.

كمان مشهد غريب اوي أن تلاقي حد بيعمل توجيه فكري للأخرين بأختيار نعم او لأ علي اساس ان رأيه هو الصح المطلق...كل واحد مننا ليه حرية التعبير عن رأيه،والمناقشه فيه،والجدال عليه..لكن محدش يقول ان ليه أدني حق يقول للغير أختار "نعم أو لأ".

عن نفسي عندي تحفظات علي التعديلات،وبالتالي لو تمت موافقتي عليها مش هتكون لاقتناعي التام بيها لكن لان عندنا 2 سيناريو فيما بعد الموافقة او الرفض علي التعديلات...من حقي انظر للاتنين واقيمهم واشوف انهم منهم يتناسب مع طبيعة المرحلة اللي احنا فيها والمرحلة الانتقالية القادمة ،واختار السيناريو الأفضل من وجهه نظررررررري بعد ما اكون اكتسبت اراء وتحليلات للوضعين من وجه نظر متخصصين من الطرفين.

أحنا كنا بنرفض الوصاية علينا فكريا كشعب من قبل أي من مبارك او نظيف او  من بعدهم عمر سليمان ،ودلوقتي بعد ما تخلصنا منهم بدأنا احنا نفرض وصايا علي  اختيارات وفكر بعض ومش نقبل الاختلاف ونعتبره أمر وارد وطبيعي.

وفجأة نلاقي ناس تتهم بعض بالعمالة،والانتهازية،واللاوعي، أو ناس يعتبروا نفسهم من القلة المفكرين اللي فاهمين صح عن باقي الشعب،وحاجات كده غريبه ملهاش لزمة خالص بصراحة بتثير استفزازي وبتقلل من احترامي لصاحب هذا الفكر لعدم احترامه وقبوله فكر غيره المختلف معاه،حتي وان قال لفظاً انه محترم الأختلاف  معاه لكن مجرد اتهامه بأي من العبارات والمعاني السابقة فهو مضمونا مش بيحترم الرأي الاخر.

في حاجة تاني تضايق جداا ان فجاة بقت كل الناس تشكك في كله واشتغلنا علي نظرية المؤامرة....شوية يقولوا الأخوان والوطني عايزين نوافق علشان مصلتحهم في التعديلات وياخدوا مجلس الشعب لحسابهم ويتحكموا...ومش عارفة ازاي بقينا بنقارن بين الأخوان والوطني انا شايفه ده ظلم اننا نقارن الوطني بأي حزب تاني...وشويه  تانين يقولوا اللي رافضين التعديلات مش فاهمين ان الجيش لو استمر حكمة هيبقي الوضع سئ وهيفرض علينا رئيس منه

كله بقي بيفتي بمزاجه....يعني انا عندي نقطة بسيطة هو  حد عنده شك ان مجلس الشعب القادم والرئيس  القادم هيتم اختيارهم من حد غيرنا...احنا الشعب...يبقي ليه االخوف...خايفين من اختيارنا ليه ما دام لاول مرة النتيجة نابعة من اختيارنا

الحقيقي دون تزوير

وانا شايفه اننا كده منفرقش حاجه عن النظام البائد اللي قعد يسوء في سمعة كل الاحزاب ويتهمهم اتهامات باطلة لاجل انجاح حزبه

احنا في عصر جديد...مينفعش نخاف من سيطرة الاخوان...ولا سيطرة أي حزب تاني...لاننا عندنا وعي زايد اوي عن الأول...والاختيار في أيدنا...ومينفعش نعامل الأخوان علي انهم جماعة محظورة زي ما كان النظام بيتعامل معاهم...هنعاملهم زيهم زي أي حزب تاني ننتقدهم ونسمعلهم ونختار منهم لو عايزين ونبعد عن اختيارهم لو رافضينهم.....بكل ديمقراطية وحرية بدون توجية...ايه بقي المشكلة اللي احنا بنزرعها دي....المشكلة فينا احنا والله

قعدنا نعمل مظاهرات وننادي بالديمقراطية ودلوقتي لما بدأنا نعيشها بنفقدها بنفسها وده يقول أننا محتاجين نتعلم يعني أيه ديمقراطية،ويعني ايه ان الاختلاف وارد، وإن رايي الصواب يحتمل الخطأ ورأي غيري الخطا يحتمل الصواب.

ممكن نقول ونلتمس العذر  ان السبب  في ده أننا سمعنا كتير عن الديمقراطية بس أول مرة نجربها ونعيشها.

ما علينا بغض النظر عن اختلافاتنا اللي بجد أمر صحي جدااا،إلا ان المهم اننا يوم 19 مارس بإعتباره اول استفتاء هتكون نتيجة حقيقية فوجودنا كلنا في لجان الاستفتاء هو المعيار الحقيقي للتغير الايجابي.

وبغض النظر عن النتيجة  اللي حتماً هتكون برأي الأغلبية...علينا كلنا تقبلها والسير فيما بعد علي سيناريو ما بعد قبولها ...هي دي الديمقراطية اللي عايزنها..واللي كنا بنحلم بوجودها.

وأخيراااً....الديمقراطية هي الحل

وفي مقولة رائعة أوي  لجيفارا يا ريت ندرك معناها...بتقول:

" أنا لا اوافق على ما تقول, ولكني سأقف حتى الموت مدافعا عن حقك في أن تقول ما تريد "

مجرد رأي

دعــاء جــابر