ثورة غضب قامت ورفعت حسها
قامت تنادي إن النهاردة صحوها
قامت وثارت حالفة تاخد حقها
من كل ظالم كان له فرصة لهدمها
ثورة شباب كان حاسس أنه وسط غابة
وأن اللي حاكم بلده شلة في عصابة
من غيمة الأيام بيحلم بالسلامة
وفي صدمة الأحداث بيتمني الشهادة
ثورة شباب كان حاسس إنه جايله دور
ويلقي نفسه فجأه غارق في بحور
ثورة شباب كان حلمه يهرب م السكوت
ويلاقي عدل وخير وحرية وسكون
ثورة شباب كان مالي قلبه بالإيمان
إنه يفك قيوده من ذل وهوان
نظام بيحكمنا نزع منا الأمان
ثورة شباب عارض بسلمية وأدب
علي كل صرخة آه سمعها وأكتئب
صمم تكون الثورة صوته اللي أنكبت
ويكون له في الميدان شهادة تتحسب
وكفاحه للتحرير تاريخ ليه يتكتب
ثورة شباب كانت حكومته بتخمده
ورموز نظامه حاولوا يمحوا خطوته
جابوا بلطجية وخونه يقفوا في سكته
فاكرين سلاح الموت هيضرب ضربنه
ويبث فيهم خوف وينهي ثورته
ثورة شباب إعلامه شوه سمعته
غير و و زور في حقيقه ثورته
قالوا عميل خاين أجندة بتحكمه
وبالرشاوي ووجبة كنتاكي تشكمه
لكن شبابنا قام وواصل سكته
قاوم وصمم إنه يضرب ضربته
وعزيمته زادت في مواجهة مُحبطة
ده لأنه مؤمن م البداية بفكرته
قال أن حريته في وصوله لرغبته
مش بالمساومة لحقه تبقي سكتته
دعـــاء جـــابر
6/2/2011
ملحوظة:حقوق التصوير محفوظة
الصورة الأولي...بعدسة الزميل أحمد رمضان مصور بجريدة الدستور
الصورة الثانية ...بعدسة الزميل أحمد ناجي مصور بجريدة الشروق
الصورة الثالثة...بعدسة الزميل رافي شاكر مصور بجريدة الشروق
الصورة الأخيرة...بعدسة أميرة مرتضي أول مصورة صحفية بإسكندرية
No comments:
Post a Comment