ثقافة الغلط

إذا دققت النظر ستجد دائماً لكل شعب .. ولكل بلد .. ولكل قرية .. ولكل شارع .. ولكل عائلة .. حتى لكل أسرة ..في كل مكان في العالم .. بعض الأفكار .. أو القناعات اللي بتنتشر فيها .. حتى تصبح قانون .. أو عُرف .. بغض النظر عن الدستور .. والحكومات .. والرؤساء .. والقوانين

وأتحدث هنا عن بعض الثقافات التي تؤثر في سلوكيات الأفراد .. فتجد مثلاً: شعب يعشق العمل مثل اليابانيين .. وشعب أخر يعشق المتعة بكل صورها مثل الأمريكان .. وشعب يعشق الكرة مثل البرازليين

مش هنتكلم عن اي حد .. هنتكلم عننا بس .. عن شعبنا .. عن دماغنا .. عننا احنا .. أنا وأنت .. وهو وهي!!

طيب إيه المشكلة ؟؟ 

 المشكلة إن هناك بعض ثقافات خاطئة انتشرت بيننا .. واحنا لعلنا موافقين عليها .. أو شايفنها صح .. أو مش شايفنها خالص .. ولا واخدين بالنا منها خالص .. مع انهاغلط!! .. ممكن تكون عيب .. أو حرام .. أو مش عيب ولا حرام .. لكنها م الآخر غلط ..

وممكن تكون مجرد غلط بسيط .. ونشوفه ما يستهلش .. لكنه مهما كان يعتبر غلط .. وآثره علينا كبير .. وبيترتب عليه بعد كده بلاوي كتير

 

علشان أوضح كلامي أكتر

تعالوا ناخد بعض المشاهد .. وخليكوا معايا للآخر

 

ثقافة الغلط .. في المرور

في أي بلد محترم .. كل سائق وكل راكب .. لازم يحترم قوانين المرور .. حفاظاً على سلامته .. وسلامة الآخرين .. وأرواحهم .. وحفاظاً على النظام .. وحفاظاً على الوقت .. والهدوء .. لذلك فإن كثير من هذه البلاد فرضت عقوبات شديدة على من يخالف قوانين المرور .. ومنها بلاد عربية ومتخلفة زينا .. وذلك لأنهم يعرفوا مدى خطورة انتهاك قوانين المرور .. وعلى المقابل تجد الناس تلتزم .. لتكون الصورة في النهاية لبلد محترم شوارعه منظمة .. والمرور فيه هادئ ..

لكن في مصر .. تشوف مشهد متكرر لـــ...:

 

حوادث وعطلة في المرور السبب الاساسي فيها عدم مراعاة قوانين المرور...وطبعاً عدي علينا كلنااا مناظر الرشوة اللي ممكن اي سواق يديها لرجل المرور عشان يفوتله اي مخالفة...وفي المقابل رجال المرور كمان بقوا سعيهم الاول ورا الرشوة دي وكأنهم بيستغلوا الاخطاء في المرور للمال

موقف تاني...

واحد عنده عربية ملاكي .. ومستعجل جداً .. وأخد قرار يمشي عكس الاتجاه .. ده شئ يعتبر عادي جداً .. بل إنه يعتبر ذكاء وشطارة .. لكن لو حضرته .. ماشي بعربيته ولقى واحد ماشي مخالف .. يبقى (مش بني آدم .... ومبيفهمش)

ومشاهد كتير اخدين عليها زي:

 

* واحد سواق يجزء المسافة .. والناس الغلابة لا حيلة لهم ..فمثلاً: المفروض إن المسافة تكون من المندرة للمنشية او لبحري.. فتكون من المندرة للمجمع مش عارفه ليه المجمع بقي محطه .. ومن المنشية لبحري .. والناس لا تستطيع إلا أن تدفع ضعف الأجرة وإلا هيبقوا متلقحين في الشوارع

 

* أتوبيس نقل عام بيقف في محطات عادي جداً .. وبين المحطات بيفتح علي الرابع برضه عادي جداً .. لكن اللي مش عادي إنك تلاقي ناس بتنزل منه .. وناس بتجري جنبه وهوووووب تنط فيه .. وناس بتقع .. وناس متشعلقة علي الباب .. كل ده وهو مش واقف في محطته .. لأ ده وهو فاتح علي الرابع

 فاكرين الكليب بتاع سامي يوسف اللي اسمه "حسبي ربي" كان بيصور أشهر المشاهد لكل بلد .. انجلترا وتركيا والهند ومصر .. فجاب إن أشهر مشهد في مصر وهو بيجري يلحق أتوبيس والأتوبيس ماشي ولما نزل من الأتوبيس نزل منه برضه وهو ماشي ..

 تفتكروا ده معناه إيه؟!!

 

النتيجة: 8000 روح بشرية تزهق على الأسفلت كل عام .. تموت بسبب كل البلاوي دي .. نتيجة أخطاء السواقين أو المشاة .. فوضي في معظم شوارع مصر .. تعطيل للمصالح .. كثير من العراك والخناق .. فوضى بكل معنى الكلمة

 

ثقافة الغلط .. في النظافة

مشهد متكرر لــــ ..... :

* واحد بياكل أي حاجة تيك أواي في الشارع .. طبعاً حياكل بالهنا والشفا .. ويخلص .. ويرمي والورقة .. فين؟؟ .. ها ... فين؟؟ .. في الشارع طبعاً ..

* واحد ماما بعتته و حكمت عليه يرمي الزبالة .. ماشي ..  مش دي المشكلة .. تلاقي الأستاذ شايل كيس الزبالة ..وفي اماكن كتير جدااا جوا مصر بيحصل الكلام ده ..تلاقيه بيتلفت يمين وشمال زي الحرامي .. وأول ما يلاقي محدش باصص .. والجو أمان .. هوووب .. يرمي الكيس في أي جنب .. ويكمل مشي .. .. وتلاقي في نفس المكان اللي رمى فيه الناس كاتبة له ع الحيطة "ممنوع إلقاء القمامة .. "!!

* واحد طلع محترم شوية وشال الكيس لحد الصندوق .. لكن لسه حيفتح صندوق الزبالة وإيده نضيفة .. ولسه غاسلها بديتول .. فيرمي الكيس جنب الصندوق .. وكده تمام اوي وعمل اللي عليه

* واحد عنده محل عصائر طبيعية تلاقيه محتكر صندوق اونيكس بتاع الشارع جوة المحل كأنه اشتراه بفلوسه .. ويصبح حق التخلص من المخلفات مقتصر عليه فقط

 

الظررررريف بقي:

 

* واحد بيحب واحدة .. واحدة بتحب واحد .. شلة بيحبوا بعض .. واحدة ضحكت على واحد وخانته وسابته .. ذكريات عن أيام العذاب والزحف علي التراب .. قصص كتير .. حتلاقي أبطالها وأحداثها .. مكتوبة على الحيطان .. وكراسي الاتوبيس.. والبينشات في المدرجات .. وعلى سلالم الكلية .. وعلى القعدات اللي علي الكورنيش ..

والنتيجة: بلد شوارعها قذرة .. المخلفات مرمية في كل حتة ماعدا صناديق الزبالة .. حشرات .. أكوام مخلفات .. .. برغم إن في دول عربية زينا .. وشوارعها نضيفة .. والبلد نضيفة .. لأنهم بيفرضوا غرامة على اللي يرمي ورقة في الأرض .. ولأنهم مش بيحبوا يسجلوا قصة حياتهم العظيمة على الحيطان

 

مش النهاية

لن أكون كهؤلاء اللي بيشتموا في الشعب المصري .. ويرددوا: "الشعب المصري ده شعب كذا وكذا وكذا..." لكني أنا منه .. عايشه معاه.. بحبه .. وبحب بلدي أكتر من أي بلد .. ونفسي كلنا نتغير ونتحرك ونفوق .. ونبقى زي اللي كانوا زينا وبقوا حاجة تانية ..اتغيروا واتحركوا وفاقوا .. لن نلقي باللوم على حكومة .. ودولة .. ورئيس .. وحزب .. لأننا قادرين بفضل الله أن نغير كل شئ .. لنكون الأفضل